ProfesoradoGalicia.com vén de estrear unha aplicación que permite localizar centros educativos galegos segundo a túa posición ou calquera localización que introduzas manualmente. A ferramenta, dispoñible de balde na web, está pensada para axudar o profesorado que participa en concursos de traslados, CADP ou procura de destinos, así como a quen desexe coñecer a oferta e características dos centros.

Como funciona

O sistema detecta automaticamente a túa posición (se así o permites) e amosa un listado de centros ordenados por distancia ou tempo estimado de desprazamento. Tamén podes introducir manualmente un enderezo ou lugar, coa opción de autocompletado e suxestións.

A partir desa localización, podes aplicar filtros avanzados como:

• Tipo de centro (CEIP, IES, CPI, CFEA, CIFP, EOI…)
• Provincia
• Xornada e especial dificultade (cando corresponda)
• Busca por nome de centro
• Busca por especialidade impartida

O resultado amósase nunha táboa interactiva con ligazóns á ficha oficial da Xunta, acceso directo a mapa, Street View, rutas en coche, e botóns para copiar rapidamente os códigos de centro ou localidade.

Información detallada de cada centro

Ao abrir a ficha dun centro, a aplicación amosa datos completos como:

• Especialidades docentes e unidades por etapa
• Número de prazas de PT, AL, orientación…
• Oferta de ciclos formativos e familias profesionais
• Enlace directo á oferta completa de FP

Esta información, organizada segundo o tipo de centro, é especialmente útil para planificar destinos ou preparar peticións de prazas.

Recoñecemento e agradecementos

A nova versión de Cole Maps xa está dispoñible en Profesoradogalicia.com, substituíndo por completo á anterior aplicación de Centros educativos creada por Marcos Chavarría, quen autorizou hai anos a súa publicación na web e cuxo traballo estivo dispoñible durante moito tempo ao servizo do profesorado galego.

Desde ProfesoradoGalicia.com queremos expresar o noso agradecemento a Marcos polo seu proxecto pioneiro e a Alberto Fortes pola súa colaboración na recollida de datos para Cole Maps, sen a cal esta nova ferramenta non sería posible.