Ola a todas e todos!

As persoas que compartides a trincheira das aulas sabedes ben o tempo que nos leva preparar materiais actualizados. No meu caso, impartindo docencia en ciclos de informática, preparar guías paso a paso, manuais de administración ou laboratorios implica un esforzo continuo para que o alumnado teña contido técnico útil, rigoroso e ao día.

E iso por non falar da burocracia: encher os campos de PROENS, cadrar o calendario escolar coas horas do módulo… Todos sabemos o que é pelexarmos con iso ao inicio de cada curso.

Nos últimos tempos levo experimentando bastante coa IA xerativa. O potencial é enorme, pero a miúdo as respostas xerais que dan os modelos non se adaptan á nosa realidade na Formación Profesional en Galicia. Necesitamos formatos específicos, enfoques prácticos e un aliñamento milimétrico coa nosa normativa.

Por iso animeime a desenvolver dúas ferramentas (dúas “skills” ou instrucións de sistema), inicialmente probadas en Claude pero totalmente adaptables a ChatGPT, Gemini ou calquera outra IA xerativa, orientadas ao noso traballo. Acabo de publicalas na miña web e quero compartilas con vós para que as poidades aproveitar.

Un detalle importante antes de continuar: aínda que os meus exemplos son de Informática, estas ferramentas valen para calquera especialidade de FP.

É máis, o xerador de materiais didácticos é tan versátil que se pode usar sen ningún problema para preparar contidos doutras materias e etapas educativas.

Que son exactamente estas Skills?

Son instrucións preconfiguradas que lle dan á IA o contexto exacto de como traballamos na FP galega. Funcionan como “prompts” de sistema, é dicir, indicacións iniciais que lle din ao modelo como se debe comportar, que ton usar e que formatos xerar. A partir dese momento, o asistente comportarase como un compañeiro especialista na nosa metodoloxía.

Na web tedes as instrucións (os ficheiros .md) e explico como podedes utilizalos na vosa IA favorita, xa sexa mediante os GPTs personalizados de ChatGPT, as instrucións personalizadas noutras plataformas ou simplemente pegando o contexto ao inicio da conversa.

Aquí tedes o que fai cada unha:

1. fp-didactic-generator: A túa axuda cos materiais do alumnado
   Esta skill está pensada para a creación de todo o material da aula. Que lle podes pedir?
   • Apuntamentos e guías: Perfecta para estruturar unha unidade didáctica desde cero ou facer unha guía paso a paso.
   • Prácticas e proxectos: Xera exercicios avaliables cun enfoque moi procedemental e práctico.
   • Troubleshooting: Un dos meus escenarios favoritos. Crea supostos de resolución de problemas, algo vital cando ensinamos calquera módulo técnico.
   • O mellor? Está programada para garantir a vixencia tecnolóxica e para priorizar sempre que sexa posible o uso de software libre. Ademais, podes pedirlle a saída en formatos útiles como Markdown, HTML5 ou Word e, por suposto, escoller entre galego e castelán

2. fp-proens-generator: Vencendo a burocracia
   Se a primeira skill é para a aula, esta é para o despacho. Está centrada na Programación Didáctica e no calendario do curso.
   • Aliñada con PROENS: Coñece perfectamente os apartados (do 1.1 ao 11.1) e xera os contidos con validacións de encadre listos para introducir na aplicación.
   • Calendario de aula realista: Cruza as horas do teu módulo co calendario escolar oficial, facendo automaticamente a engorrosa conversión de horas a sesións de 50 minutos (ese famoso factor multiplicador de 1,2).
   • A saída podes xerala en Word, Excel, PDF ou en texto estruturado listo para copiar e pegar.

A nosa responsabilidade: Supervisar e verificar

Unha última reflexión antes de rematar: a responsabilidade final do que levamos á aula sempre é nosa. Aínda que estas ferramentas afinan moitísimo os resultados, debemos sempre supervisar o que xeran e probar que todo é correcto antes de darlle uso real.

É fundamental que usemos a IA do mesmo xeito que queremos que o fagan os nosos alumnos e alumnas: como un apoio para aprender, estruturar ideas e axilizar o traballo, pero sempre verificando os datos cunha mirada crítica, nunca copiando e pegando ás cegas.

Onde podedes atopalas?

Tedes toda a información, os manuais de uso detallados (con instrucións para usalas en distintas IAs) e os arquivos SKILL.md listos para descargar de balde na miña páxina web:

Xeradores de contido para FP en Galicia (FP Skills) https://javierfeijoo.eu/desarrollos/fpskill/index.html

As dúas ferramentas están publicadas baixo licenza libre CC BY-NC-SA 4.0.

Animádevos a probalas cando teñades que preparar a vindeira unidade de traballo ou cando toque programar o vindeiro curso. Espero que vos aforren tantas horas como me están aforrando a min!

Coma sempre, calquera feedback, proba de uso ou suxestión de mellora será moi benvida nos comentarios.

Bo verán, e vémonos polas aulas!