Porén, baixo esta capa de modernización e dixitalización, o que se agocha realmente é unha simplificación dos procedementos… para a propia Administración, non para o profesorado. Con esta ‘app’, a Consellería reduce pasos internos e automatiza un sistema que lle consume recursos, pero non incide nin un ápice na montaña de burocracia que afoga ao profesorado dos centros, nin no tempo que cada docente dedica a cubrir documentación, informes ou tarefas administrativas alleas á docencia.

Mentres o conselleiro de Educación, Román Rodríguez, asegura que a simplificación burocrática será “un ámbito prioritario” a partir de setembro, o único proxecto concreto que se coñece é unha ferramenta que facilita as xestións da Xunta para dispoñer de substitutos, reducindo a súa carga operativa interna. Quen verá así reducido o tempo e o traballo administrativo non será o profesorado, senón a propia Administración.

E aínda por riba, resulta case cómico escoitar á Consellería presumir de que os profesores substitutos “non terán que estar constantemente pendentes do seu teléfono por se reciben unha chamada da Administración”. E logo? A app vai polo aire e vén polo vento para avisar sen necesidade de teléfono? Ao final, sempre haberá que estar pendente… do mesmo dispositivo.

Por certo, xa que falamos de aplicacións para vacantes: en ProfesoradoGalicia.com, na sección de substitucións, está dispoñible desde o curso pasado unha aplicación que si pensa no profesorado, notificando automaticamente —e de maneira práctica e directa— as vacantes que se publican na web da propia Consellería. Un exemplo de como poñer a tecnoloxía ao servizo dos docentes, e non só ao servizo da Administración.